နံ့သာဖြူ (စန္ဒကူးဖြူ) (Sandalwood/ Santalum album)
နံ့သာဖြူ (စန္ဒကူးဖြူ) ဆေးဘက်ဝင်သည့်အပြင် နှစ်ပေါင်းများစွာမပြယ်သည့် အမွှေးရနံ့ရှိသည့်အတွက် တန်ဖိုးကြီး သစ်ပင်တစ်မျိုးဖြစ်သည်။ နံ့သာဖြူကို မြန်မာ့ပရဆေးတို့တွင်ထည့်သွင်းအသုံးပြုကြ၍ သူ့ချည်းသက်သက်လည်း ဆေးဘက်ဝင်အာနိသင်ရှိသောကြောင့် သွေး၍လိမ်းခြင်း၊ သောက်ခြင်း တို့ကိုလည်း ပြုလုပ်နိုင်သည်။ အိန္ဒိယမျိုးရင်းဖြစ်၍ မြန်မာနိုင်ငံတွင် ရန်ကုန် ကမ္ဘာအေးလှိုဏ်ဂူပတ်ဝန်းကျင်၊ ပြင်ဦးလွင်နှင့် ပုပ္ပါးတောင်ခြေ အစရှိသည်တို့တွင် စိုက်ပျိုးထားရှိသည်။
အမြဲ စိမ်းလန်းသော ပင်လတ် တစ်မျိုး ဖြစ်၍ ပေ ၃၀ မှ ၄၀ အထိမြင့် ၏ ။သေးသွယ်၍ တွဲကျသော အကိုင်းအခက် များရှိ၏ ။ အခေါက်နီညို ၊ သို့မဟုတ် အညိုရင့် ရောင်ရှိ၍ အတွင်းခံ အနီရောင် ရှိသည်။
ခါးသက်သောအရသာရှိ၍ လိမ်းထားပါက အေးမြသည့်သဘာဝရှိသည်။ အပူရောဂါ၊ နှလုံးရောဂါနှင့် အဆိပ်အတောက်ဖြစ်ခြင်းတို့အတွက် အထောက်အကူပြု၍ အခြားသဘာဝဆေးများနှင့်ပေါင်းစပ်အသုံးပြု၍ လည်း ပျောက်ကင်းနိုင်သည့် ရောဂါ အမြောက်အမြားရှိ၏။
နံ့သာဖြူသားမှထုတ်ယူရရှိသောအဆီကို အမွှေးနံ့သာအဖြစ် အသုံးပြုကြ၍ မြန်မာလူမျိုးများအနေဖြင့် ဘုရားဆင်းတုတော်ကို နံ့သာဖြူအတုံးမှရရှိသည့် နံ့သာရည်ဖြင့် ပက်ဖျန်းပူဇော်ခြင်း၊ နံ့သာဖြူအမွှေးရနံ့ပါသည့် အမွှေးတိုင်များ ကပ်လှူပူဇော်ခြင်းတို့ကိုပြုလုပ်လေ့ရှိကြသည်။ တရားထိုင်သည့်အခါ နံ့သာဖြူရနံ့ကို ရရှိနေခြင်းဖြင့် စိတ်ကိုကြည်လင်နိုးကြားစေ၍ အာရုံစုစည်းမှုကို အားကောင်းစေသည်ဟု ဆိုကြသည်။
သဘာဝအတိုင်း မွှေးရနံ့ရနိုင်သည့် အခြားသစ်မျိုးများစွာရှိသော်လည်း နံ့သာဖြူကဲ့သို့ ဆယ်စုနှစ်ပေါင်းများစွာ မွှေးရနံ့ရှိနေနိုင်သည့် သစ်မျိုးမှာ ရှားပါးလှသည်။ ကမ္ဘာတွင် ဒုတိယတန်ဖိုးအကြီးဆုံးသစ်အမျိုးအစားဖြစ်၍ အလွန်အကျွံခုတ်လှဲမှုကြောင့် အရေအတွက်နည်းပါးလာသည့် ဘေးနှင့်လည်း ရင်ဆိုင်နေရသည့် သစ်အမျိုးအစားဖြစ်သည်။ နံ့သာဖြူသားဖြင့် ဘုရားဆင်းတုတော်များ၊ ရုပ်တုများ၊ ယပ်တောင်နှင့် ပုတီးများ ပြုလုပ်လေ့ရှိကြသည်။
MYANHOUSE 